Voscenza assa benedica

vecchio ricorda

Voscenza assa benedica

Affacciàti a la finestra di la vita

li vecchi talianu nn’arreri

e chiancinu pinzeri rammaricusu

di figghi luntani

e verri ancora vivi

dintra l’occhi d’’a menti.

Nto menzu di li ’gnuni cchiù funnuti

d’’i signi chi fiddulianu li frunti arrappati

hannu ancora ’nsirragghiata ’a suffirenza

di pani scuttatu c’’u suduri.

Li vidi assittati cu li testi a pinnuluni

supra seggi jincuti cu pampini ’i scupazzu

e jirita caddusi ch’alliscianu testi di muciddi.

E doppu ’na vita di liccarisi ’a sarda

e strinciri la currìa supra vuredda fràrici

la notti vigghianu cu li pinnulara ùmiti

c’’u scantu di finiri nt’on spizziu

abbannunati d’’i stissi figghi

nutricati scuttannu feli.

Caminanu ’n menzu a ghiòmmari ’mpirugghiati

di rigordi annigghiusi.

Ogni tantu trùppicanu nta unu bellu

ch’agghiorna ancora la menti

quannu cu rispettu si sintianu ancora diri

“Sabbenerica a vossìa!!”

e tu ci vidi ’na risatedda leggia ’ntall’occhi

e subbitu nautra vota facci arripudduti.

E la menti arreri dda

a livari pruvulazzu

di supra ’i megghiu rigordi.

Li pigghianu ogni jornu a unu a unu

e l’allustranu comu si fussinu cosi priziusi

…comu si fussinu…

l’urtima cosa chi ci arristò di nutricari.

Vincenzo Aiello

Bagheria, 1 giugno 2011

1 commento

  1. Renato Fraggetta's Gravatar Renato Fraggetta
    15 Novembre 2021    

    Esimio Maestro,
    ho posto un commento lusinghiero al suo dipinto “Voscenza assa benedica”. Le mie origini sono siciliane, tuttavia vivo da anni in Portogallo. Sarebbe possibile acquistare una copia in acrilico del dipinto (a colori) di questo uomo anziano che ricorda la figura di mio padre, uomo straordinario ormai mancato da più di tre anni?
    I miei rispetti.
    Renato Fraggetta
    P.S. Le consiglierei di includere le Sue opere nel sito FineArtAmerica (Chicago). Ritengo che avrebbe successo.

Lascia un commento

Il tuo indirizzo email non sarà pubblicato. I campi obbligatori sono contrassegnati *