Vecchiu piscaturi

vecchio piscaturi

Vecchiu piscaturi

A nasca a patata

arrappata e ntrippata

com’un pirittuni maturu

supra ’na vucca sgangulata

ca cuntava cosi antichi

di na vita ’i nisciuti a mari.

Niuru comu un tizzuni arsu d’’u suli

’u sali ci abbruciò puru l’arma

li jirita fidduliati d’’u pilu d’’i palàncari

ma iddu cuntentu era

picchì chidda era ’a sò vita.

Ddà, sutta ’u picu d’’u suli.

E quanta acqua ’i celu ch’assuppò ’a sò peddi

e furturati ’i mari

ca pareva un dumaturi d’unni.

Ora ’i sò occhi chiancinu senza lacrimi

talìa ’a sò varcuzza tirata ’n siccu

appuntiddata cu dui traviceddi camuluti

e penza ca comu iddu

addivintò tantu lasca

a lu puntu d’un putiri cchiù stari ’n summa.

Quanti piscati ricchi ’nsemmula ad’ idda

e quanti vuccati amari

p’’i voti ca s’arricampava a la casa

senza un pezzu di pani p’’i picciriddi.

Ora iddu vulissi aviri la forza

d’ammuttari dda varcuzza

e faricci allisciari ancora ’u lignu d’’i paràti

’nfin’ a pusarla ntall’acqua

pi fari ’nsemmula l’urtima piscata

e affunnari cu idda…araçiu

ntò sò mari.

Nessun commento ancora

Lascia una risposta

L'indirizzo email non verrà pubblicato. I campi obbligatori sono contrassegnati *