Un roggiu di picca valuri

vecchioorologio

Un roggiu di picca valuri

P’un pilu ’un ci finiu nta munnizza

nt’on scatulu di scarpi chinu ’i negghi.

Dicivanu… su’ cosi di jittari!!

appartinuti ò tata bonarmuzza.

Prima di jittallu un’urtima scaliata

t’’u vidu ò latu a un muscaloru ’i fimmina

arripizzatu c’’u nastru ’ncuddusu

un reggipettu ’i pizzu ’raccamatu

e autri fissarìi ’i picca cuntu.

Iddu era un roggiu di picca valuri

di l’oru avia sulu lu culuri

’na marca ca nun’era assai famusa

cinghietta di piddunci ’ncutrunuta

cu ’n punta ’a fibbia menz’arrancitusa.

Lu quatranti ca ’na vota avia jessiri jancu

l’anni l’avianu tinciutu di ’na giallumi

ca all’occhi lu facìa pariri cchiu beddu

di quannu niscìu novu d’’u ruggiaru.

Vicinanzu d’’u nummaru sei

c’era ’a lancetta nica d’’i secunni

ca nta lu mentri ch’aspittava ’u jornu

ca occhidunu l’arruspigghiassi arreri

durmiva cu ’na manu a la mascidda

vulannu supra sonnari attimpati di splinnuri

quannu idda e ’u so’ patruni

trippiavanu la vita comu putri.

A forma ’i babbu certu di falliri

strincivu tra li jita ’u piricuddu

tuttu smanciatu e tortu ch’annacava

e ’na firriata ’i corda ci lampìu.

A la ntrasatta vidu ’a nicaredda

comu ’na picciridda priannedda

ca leta ’i riturnari a jucari

cumincia a fari un beddu girutunnu.

Lu cori miu ’a pigghiò manu-manuzza

e cu idda satariava ’i cuntintizza

pinzannu a ddu cristianu ’n paraddisu

prijatu ca ’u scanzavu d’’a munnizza.

Lu roggiu so’ di picca valuri

a ddu mumentu nta li manu mei

era priziusu cchiu d’un roggiu d’oru

picchì ai rigordi ’un si po dari prezzu.

Ntisi pusari ’a manu di lu vecchiu

supr’a me spadda comu di rispettu

vitti ’i so’ occhi scaccaniari ancora

e un gran suspiru mi jinchìu lu pettu.

Nessun commento ancora

Lascia una risposta

L'indirizzo email non verrà pubblicato. I campi obbligatori sono contrassegnati *