Un cocciu di simenza

Un cocciu di simenza

Un cocciu di simenza

 

L’autra vota mi fici assai pinzari

la vista di ’nu cocciu di simenza

pareva mortu senza rispirari

ch’arrizzanu li carni si unu penza.

 

’Na cosa nica chi manc’accumpari

chi nun si movi comu ’nzalanuta

appena l’acqua la va pi tuccàri

’rrivisci comu Làzzaru a ’na vota.

 

M’’u misi nta la punta di ’nu jìtu

taliannulu d’’i pedi ’nfin’a testa

la facci ’nsiccumata com’u zitu

doppu la prima notti di la “festa”.

 

Mill’anni dormi ch’è ’na maravigghia

m’appena tu lu vai a bruricari

la vita d’intra d’iddu s’arruspigghia

sazziannu ch’i so frutti a tutti pari.

 

Sta cosa nica e ’nsignificanti

sazzìa tanti vucchi strati-strati

e l’omu ca si senti cchiù ’mpurtanti

fa moriri di fami a tanti frati.

 

 

 

Vincenzo Aiello

Bagheria, 8 marzo 2010

Nessun commento ancora

Lascia una risposta

L'indirizzo email non verrà pubblicato. I campi obbligatori sono contrassegnati *