- L'Uomo - Il Poeta - Riconoscimenti - Bagheria - Contatto - Home -
- Opere Siciliane - Opere Italiane - Traduzioni in lingua Italiana - Cunti - Concorsi - Blog -
’U ’miriusu
Matinalòri ’i pàssari d’’u locu
si dettinu ’n mpurtanti appuntamentu
ddà ’ncapu a l’arvulicchiu di varcocu
addurmisciutu e privu ’i vistimentu.
Accuffulati ognunu ’a so ramuzza
mi parsinu napocu ’i viulinista
ca cu l’archettu-beccu e gran distrizza
priparanu ’u cuncertu pi la festa.
L’uccasiuni era ’i gran valuri
picchì granniusu preju s’avìa fari
tappiti virdi stinnicchiati e çiuri
’a primavera stava p’arrivari.
A la ’ntrasatta a un pezzu ’i carcarazza
ci veni ’u spinnu di lu cuncirtinu
si ’mposta ’n menzu ad’iddi ’a ’miriusàzza
stracquànnuli... e finisci lu fistinu.
Pi ogni cosa ca tu penzi o fai
na fissaria o ’a stissa “O” di Giottu
’u ’miriusu un po’ mancari mai
chi ccì siccassi ’a lingua e ’u varvarottu.
Copyright ©2005 Vincenzo Aiello Tutti i diritti riservati.