’U mari

u mari

 

’U mari

( A Fabio Raluca e Nicole)

 

E semu cca stu jornu a ringraziari

lu Signuruzzu chi biniricìu

lu vostru matrimoniu nto so Altàri

e d’’a bedda Nicole ’u so vattìu

 

Li strati ca si ràpinu nta vita

nun sunnu quasi mai chiani e lucenti

ma araçiu araçiu cu lu sintimentu

diventanu scinnuti ntemp’un nenti

 

La vostra, ora è nt’on quatrivìa

basta pigghiari la rittùra giusta

truvari ’u ngrizzu bonu pi campari

e a picca a picca ’u tempu ’i cosi ’aggiusta

 

Pi campari cuntenti ’i nostri jorna

avemu di bisognu ’i tanti cosi

l’amuri d’’a famigghia…lu travagghiu

ma ci nne sempri spini nta li rosi

 

L’amuri c’è sicuru e lu videmu

na picciridda ca è un raru çiuriddu

e araçiu araçiu nun vi preoccupati

ca zoccu manca arriva puru chiddu

 

Lu mari avvicina ’i cuntinenti

l’alliscia chi so acqui… ’i fa vasari

e pi vasari Italia e Romania

nu granni sforzu iddu appi a fari

 

Lu mari ca vi fici di ruffiànu

e nna dda navi vi fici ncuntrari

arresta pi vuatri ’u megghu amicu

e a iddu sempri aviti a ringraziari

 

Un mari ca v’arrialò l’amuri

un mari ca accumpagna ’a varchicedda

di la vostra famigghia chi partìu

p’’a vostra travirsata duci e bedda

 

 

Vincenzo Aiello

Nessun commento ancora

Lascia una risposta

L'indirizzo email non verrà pubblicato. I campi obbligatori sono contrassegnati *