‘U çiaramiddaru

uciaramiddaru

‘U çiaramiddaru

Comu canni d’organu

d’ì scaletti ‘i ‘na pirsiana

sinteva nesciri musica ‘ì çiaramedda.

Ma…allura scinni ancora

d’ì so muntagni ‘u çiaramiddaru.

Nuuu-neee…nuuu-neee…

Avìa assaiùni ca ‘un sintìa sta duci miludia

chi nesci d’à peddi vuncia di çiatu d’omu.

Nun lu vidu ma… lu sentu.

E’ dda …davanti lu prisepiu d‘à vicchiaredda

ca ancora ‘un’accetta ca l’èbbichi canciaru.

Menu mali  ca c’è ancora idda

ca un’abbannùna li vecchi usanzi

c’à portanu ‘narreri nn’ò tempu

quannu ‘mpignava lu çiaramiddaru

pi ‘nsignari a li so picciriddi

ca ‘ì valuri di purtari avanti eranu chiddi.

Nuuu-neee…nuuu-neee…

Lu primu caddozzu finisci.

Lu tempu ‘i dari dui çiusciuna

dintr’à pidduncia allaccaruta ‘ì pecura

e accumincia lu secunnu.

M’arrizzanu li carni a sentiri ‘ù ritmu ora cchiu lestu.

Musica ‘ncantatura ca mi fa riturnari

nna dda strata ‘nciacatata

unni jucava quannu era nicu.

Nuuu-neee…nuuu-neee…

Puru lu secunnu caddozzu finisci.

Nta na vota scrùsciu di picciuli un salutu

e ‘u viu sfilittari fora d’à pirsiana.

Avìa ncucciata nt’on vrazzu ‘a pecura svuncia

ch’ì friscaletti a pinnuluni bardati ‘ì nastra culurati.

Ma!!…un’era ‘ù vicchiareddu menzu immurutu

ca io avìa disignatu nn’à menti.

Macari ‘u figghiu!!

Chi siddìu di cori

vidiri ca un’era ddu beddu viddanu

ca ti facìa sunnari cu piaciri

mari virdi unni pasciri armali e omini.

Chistu …’nfittatu d’à nostra malatia muderna

va currennu com’à nuatri

e ‘ù sulu pinzeru ca cci leggiu nta l’occhi

è ‘u scantu d’un truvari cchiu ‘a machina unni ’a lassò.

Quannu mai so patri

‘a finuta d’à nuvena scappava ‘i primura.

S’assittava a chiacchiariari c’ù parruccianu

e ‘un nisceva ‘i dda casa

si prima un’avìa accittatu un pizzuddu ‘ì sfinciuni

un cucciddatu e un bicchireddu ‘ì vinu pistatu ch’ì pedi

ca ognarunu ci dava cu cori.

E ‘à musica

ca ora sentu nèsciri d’à çiaramedda

un’è cchiù ‘a stissa.

Vincenzo Aiello

 Bagheria 28 ottobre 2007

Nessun commento ancora

Lascia una risposta

L'indirizzo email non verrà pubblicato. I campi obbligatori sono contrassegnati *