’U caruseddu d’’i rigordi

ucaruseddu

’U caruseddu d’’i rigordi

Rumpennu ’u caruseddu d’’i rigordi

viu nesciri cusuzzi priziusi

çiauri persi di tannuri ’e porti

ca dintra ’a testa haiu tinutu nchiusi.

Sunnu pinzeri d’’a me picciuttanza

di quannu ’i cosi eranu sinceri

e la menti di l’omu era cchiù manza

chi gran piaciri rividirli arreri.

Partevanu c’’u scuru supra ’i scecchi

li nostri patri tutti jurnateri

manu caddusi e li mascìddi sicchi

mastri di petra d’Aspra a li pirreri.

Dintra ’i vaneddi ’u suli d’’a matina

vasava ’u nciacatàtu e l’addumava

cuddara janchi scocchi e mantisina

e all’ottu a matri a scola nni mannava.

Maiddi stinnicchiàti ’o suliscènti

paràvanu a fistinu li vaneddi

siccannu beddu astrattu ’n temp’un nenti

sangu quagghiatu di pumadoreddi.

Li fimmini nna mastra custurera

mparavanu dda l’arti ’i raccamari

nto mentri ch’aspittàvanu l’amuri

avevanu linzola ’i ntilarari.

E po’ li jochi di nuatri nichi

cusuzzi simplici fatti di nuatri

nenti compiuter sulu cosi antichi

ca nni nsignavanu li nostri patri.

Strummuli ’i fràscinu pi dari pizziàti

ò fussiteddu cu li catineddi

ch’i cincu liri a li zicchittàti

accosta ’o muru chi stuppagghi a stiddi.

Po’ siddu pi vintura s’attruvava

tri roti a pallini e dui lapazzi

na bedda prattina si fabbricava

pi jiri a l’adiddì pi strati e chiazzi.

Li carritteddi di li gilatara

o d’Austìnu cu li ficoccelli

tri penni centu liri ’i scanciu ’i dollari

a riffa pi li strati e ’arrascatelli.

Li gnuri ca purtavanu ’i carrozzi

di la Matrici ’nfin’a puntavugghia

scattiàvanu zuttàti comu pazzi

a nuatri ’mpinnuliàti a francavìgghia.

E ch’era beddu ’u tempu a la scurata

vidiri ’i cufulara a tutt’i ntrati

lu çiauru ncantava tutt’a strata

di fumulizzu ’i ligna staçiunati.

’U scrusciu ’i campanazzu a ’rifriscàta

li matri ’e cantuneri arricugghieva

passava lu vaccàru e pi li nichi

friscu di minna ’i vacca cci ’u munceva.

Me matri cu me patri ’nnamurati

sulevanu manciari cu piacìri

nta lu stissu spillongu “assistimati”

cu cruci e vasatedda tutt’i siri.

La sira ’nveci attorn’a la bracèra

di vucchi sgangulàti ’i nanni beddi

sintìamu li cùntari e ’a quadùra

arrusicannu scacciu e cruzziteddi.

Po’ a li novi grann’appuntamentu

c’’u carosellu nto televisuri

pi nuatri era un gran divirtimentu

e po’ tutti a vovò javamu a fari.

Tutti li pizzuddicchi ora arricogghiu

di lu me caruseddu d’’i rigordi

li ’mpìccicu c’’a codda pirchì ’un vogghiu

ca zoccu i dda niscìu poi lu scordu.

C’’i nfilu araçiu araçiu a unu a unu

cu manu dilicata di pinzeri

ma mentri trasinu io pò m’addunu

ca sunnu troppu beddi… e ’i nesciu arreri.

Nessun commento ancora

Lascia una risposta

L'indirizzo email non verrà pubblicato. I campi obbligatori sono contrassegnati *