Ti circavu
E tampasiu circannu a tia.
A tia…
ca ‘i na picchidda ‘i tempu
picca mi parri
e mi lassi sulu
a natari nta lu nenti.
Stu jornu ti circavu
‘n menzu li petri arrusicati d”u tempu.
Dintra un çiuri
vagnatu ancora d’acquazzina.
Nta li balluna d”a scumazza d”u mari
mentri vasavanu la rina.
Nta la facci nsiccumata di ‘na pala ‘i ficudinnia.
Supra li pampini
ca ridevanu attigghiati d”u ventu.
Ti circavu
puru dintra l’occhi stanchi d’un piscaturi
doppu ‘na nuttata di travagghiu ‘n menzu all’unni
…ma ‘un ti truvavu.
Sulu middi stiddi
appujati supra ‘u mari
mi ‘ncuraggianu e mi fannu cumpagnia
e capisciu ca m”i mannasti tu
o duci puisia.
Vincenzo Aiello
Bagheria; 7 maggio 2015