- L'Uomo - Il Poeta - Riconoscimenti - Bagheria - Contatto - Home -
- Opere Siciliane - Opere Italiane - Traduzioni in lingua Italiana - Cunti - Concorsi - Blog -
Si m’arrinesci
Fogghi jittati di cca...di dda...
Napocu li tegnu
’n menzu un calapinu sicilianu
... autri affucati
dintra ’a grammatica ’i Pitrè.
Scrivuti ’accussì...
pi nchiujiri nta ’na jaggia di carta
palori assummati d’’u funnu d’’i me’ pinzeri.
Ogni tantu li pigghiu... ci dugnu ’na taliata
’i sbutulìu, junciu, aggiustu
scancellu, spostu, appattu rimi...
Pizzami di puisia o...carta nchiappata?
C’’u sapi zoccu sunnu?
A li voti ca l’haiu nisciutu
’a manu d’’u ventu l’ha fattu vulari p’un’aria
comu si vulissi farimi capiri
ch’appartennu ad’iddu
e sulu iddu è patruni
di farinni zoccu nni voli fari.
Lassarili vulari pi sempri comu balluna di sapunata
o farili pusari duci-duci
davanti li vavareddi ’i l’omu
chi cerca lu ’ncantu d’’a puisia?
Si m’arrinesci vogghiu essiri vòmmara
ch’affunna dintra ’a terra d’’a lingua siciliana.
Sbruricari timpuna di palori attrassati
e ...comu jancu girsuminu farili çiurìri arreri
pi po’ un jornu ... surisfattu
virilli abballari nautra vota
supra ’i mussa d’’i picciriddi siciliani.
Vincenzo Aiello
Bagheria,15 febbraio 2010
Copyright ©2005 Vincenzo Aiello Tutti i diritti riservati.