Si Diu voli
Jurnata manza e io a ciancu a tia
rispiru lu to çiatu friscu e chinu
di paci, ca pi ora manca o munnu
io finciu di scurdallu, e ti taliu.
Ascutu ’u murmurìu ca tu mi manni
di cunta antichi ’i vecchi piscatura
ca nta la to cullèa truvaru abbentu
e d’’i riala to sunstintamentu.
Taliu lu to urizzunti, la paranza
chi s’arricampa lesta pi lu giuccu.
C’’u sapi si lu saccu d’’a so riti
arriniscìu accrucchiari spisa bona?
Nto scogghiu ’u piscaturi c’’a cimedda
siddiatu pi la minnica so pisca
lappani, sparagghiuni e tri violi.
Dui coccia ’i trimulina ci arristaru
dumani agghiorna arreri
si Diu voli.
Vincenzo Aiello
Bagheria, novembre 2017