Scalìu mmenzu li pinsera

tranquillita

Scalìu mmenzu li pinsera

Mi sentu comu dintra nu ruvettu

ca appena jo mi movu già mi punciu.

E scalìu mmenzu li pinsera

circannu un violu nettu di spini

ri dunni nisciriminni

senza ’nsanguliari li sonnira ’ncilippati

senza scarpisari assai li timpi

lassati leggi supra li terri di l’arma

c’aspettanu simina nova.

E l’acqua ’i çelu chi scinni leggia

sbrizzia li pinnulara

’ncutrunuti d’’u friddu di l’apatia

e m’arruspigghia d’un sonnu longu.

Stamatina ’u suli spunta di punenti

e acchiana avutu

a firmari lu tempu di st’ebbica

ca a parturutu troppu cosi tinti.

Di luntanu

un leccu di campani

alliscia li canali di tutti ’i casi

comu fussinu masciddi di nutrichi

e ’ntall’ariu arregna la cchiù funnuta paci.

R’accussì la me spiranza arresta viva

’nfina chi la menti arreggi

e ’u mecciu d’’u lampiuni d’’a vita

mmiriacu d’assoliu vecchiu

arresta addumatu

a fari lustru

nte gnuni cchiu ammucciati

di l’essiri.

 

Nessun commento ancora

Lascia una risposta

L'indirizzo email non verrà pubblicato. I campi obbligatori sono contrassegnati *