Pittiddi
Comu faiddi scattìanu
d’un focu di alligria
tinciuta di tanti culura.
Scappanu
di ’na manu mascarata
e volanu
giranu
jocanu cu l’ariu
mentri occhi scricchiati
li talianu.
Vucchi sbarrachiati vucìanu
mentri iddi
’n terra si posanu leggi.
Scarpisati arrestanu dda
allisciati
di occhi ormai ’ndiffirenti.
Iddi ’un camparu assai
sulu ’u tempu
d’arrialari un surrisu
ca a vuliricci pinsari
un’è cosa di nenti.
Vincenzo Aiello
Bagheria, 27 febbraio 2017