Pigghia na petra e conzala

pigghia na petra e conzala

 

Pigghia na petra e conzala

 

 

Haiu na fimmina o me latu

ca è sciarriata cu la vugghia

e si scarpi av’allustrari

ci n’hai tempu d’aspittari!!

 

Quannu inveci è nta cucina

è ’na cuoca supraffina

si cci attrova…s’appassiona

addiventa …’na Rigina.

 

Basta chi havi ’na patata

sali, spezzi e ogghiu novu

’na cucuzza o mulinciana

vastunachi, accia, un’ovu.

 

Idda c’’a so fantasia

arrinesci a priparari

cosi ca nun si ci criri

e cu mancia fa arricriari.

 

Lu pasticciu di lasagni

sardi fatti a beccaficu

capunata ’i mulinciani

’na dilizia, nun vi dicu.

 

Parmiçiana o ’na canazza

pasta o furnu c’anilletti

ti nni manci a nun finiri

ca tu mancu sa ’unn’i metti.

 

Pasta nivura ch’i sicci

lu cus cus di pisci friscu

annittati a unu a unu

e ’u palatu m’arrifriscu.

 

Siddu anciovi poi ci portu

ci fa cumpanaggiu e pasta

chiddi grossi li marina

e li nichi ’i pigghia e ’i mpasta.

 

C’’a muddica l’ogghiu e l’ovu

menta passuli e pignoli

poi li jetta ammoddu ’a sarsa

e d’’u çiavuru tu… voli

 

Menu mali ca attruvavu

accussì c’un occhiu chianciu

nta sta vita d’amarizzi

alla fini almenu…manciu!!

 

Vincenzo Aiello

Bagheria, febbraio 2016

 

Nessun commento ancora

Lascia una risposta

L'indirizzo email non verrà pubblicato. I campi obbligatori sono contrassegnati *