Passareddu sularinu

satariannu vai cuntentu

chi cci fai tu di matinu

tra ’i ramuzzi cu stu ventu?

Sutta ’u celu fattu azzolu

cu stu friddu di jinnaru

c’è la nivi c’abbianchìa

tutti ’i cimi c’agghiurnaru

Statti accura cu stu tempu

ca ti fa attassari ’i pinni

prestu veni ’a primavera

pi quariari a tutti banni

Passareddu sta o riparu

pizzulia simenza e ciuri

si’ si stancu vai e t’aggiucchi

l’acquazzina siddu ha assuri

E si mentri vai vulannu

‘ncontri muschi e zappagghiuna

disignannu nta lu celu

tu nni fai quattru mmuccuna

Passareddu cu to cantu

ca arriali a nuatri tutti

fai scialari aricchi e arma

puru si li guai su’ ncutti!!

Vincenzo Aiello

Bagheria, gennaio 2017