’Nnuccenti

nucianti

’Nnuccenti

 

Ti ritruvasti dda…

arrassu di l’amuri ’i to matri.

 

Matri sdisangata

ca ti jittò nta munnizza.

Matri dispirata

ca t’abbannunò davanti ddu cunventu.

Matri ’n menzu ’a strata

ca ti lasssò nta naca ’i ddu spitali.

 

Autri vrazza t’annacaru

pi fariti fari ’a vovò.

Autri manu t’allisciaru ’i capiddi.

Autri vuci t’accurdaru

quannu ngusciatu chiancivi.

Autri mussa ti vasaru ’i masciddi.

 

E quantu l’addisiasti

’u çiavuru ’i ddu capicchiu

…nuddu cchiu t’’u po dari.

 

L’occhi to’ comu dui stiddi astutati

aspettanu ’a faidda di ’na palora duci

di ’na carizza

d’un surrisu

d’un mizzigghiu

pi putirisi addumari arreri di spiranza

e riturnari a cantari

comu fannu l’acidduzzi

quannu scampa.

 

Attangatu dintra ddi mura friddi

si dda ch’aspetti a mia.

A mia ca ’un ti penzu.

 

A mia chi haiu autri masciddi d’allisciari

e ’un sentu ’u to richiamu.

Nessun commento ancora

Lascia una risposta

L'indirizzo email non verrà pubblicato. I campi obbligatori sono contrassegnati *