‘Na ramuzza d’alivi

IMMIGRAZIONE: A LAMPEDUSA IN NOTTATA ALTRI 310 CLANDESTINI

‘Na ramuzza d’alivi

 Nta ’u mentri c’aspittàvamu

lu suli debbitu d’’a primavera

un celu greviu e ziccusu di rìnnini

nni sappi arrialari sulu rivutura di verri.

A sbardi sdùnanu

di nna ddi terri avvampati…

e ammunziddati s’arricampanu

supra varcuna scancarati

cummattennu cu furturati ’i mari

e ’allammicu ’i cori c’allaccarisci ’i spiranzi.

A pedi scausi e ’i facci allignàti

lustri d’ogghiu d’Argan

pussedinu sulu sacchittati ’i dispirazioni.

Di ncoddu si cunnùcinu robbi linziati

’na truscia china ’i strucchiuli

e ’nto cori ’na sula spiranza

abbrazzari arreri

’i figghi chi lassaru nna dda terra

chi mai ha avutu abbentu.

Avutri frati si stettinu dda

abbrazzàti a scupetti attassati

e c’’u jiritu appujatu nto sirragghiu

addifenninu l’ultimi rrasti ’i dignità.

Arristaru fermi dda ’i rìnnini

darreri l’ultimu cannuni…

e scantati aspettanu ’u signali

…’na pezza janca

e ’na ramuzza d’alivi

di strinciri nto pizzu

e svintuliari comu bannera

pi tutti ’i çeli d’’u munnu.

Vincenzo Aiello

Bagheria, 23 marzo 2011

Nessun commento ancora

Lascia una risposta

L'indirizzo email non verrà pubblicato. I campi obbligatori sono contrassegnati *