Munti Catalfanu
M’assettu nne to’ vrazza
o matri d’’a me’ puisia.
Tu ca mi dasti spuntu e ispirazioni
tu ca sbruricasti
di li gnuni cchiu funnuti d’’a menti
la me’ puisia.
A tia ritornu.
Tutti dui chi mussa cusuti
nudda palora
nuddu scrusciu
eppuru palori funnuti
tu mi çiusci nni l’aricchi.
Sulu musica d’aceddi
a lu cuddari d’’u suli.
’A farfalla ch’ abballa
d’un çiuri all’autru
e nto menzu d’’i rama
d’un arvulu d’alivi… ’a Baharia
ca mmiriusa di stu ’ncantu nni talia.