- L'Uomo - Il Poeta - Riconoscimenti - Bagheria - Contatto - Home -
- Opere Siciliane - Opere Italiane - Traduzioni in lingua Italiana - Cunti - Concorsi - Blog -
Me mugghieri
Me mugghieri chi purtentu
è ’na vera cosa rara
m’’a pigghiavu e un mi lamentu
m’attuccò e m’’a tegnu cara.
Ma ci su certi mumenti
ca mi fa sfirrari ’u senziu
prisuntusa e pitulanti
fazzu abbili si cci penzu.
Havi sempri d’’a so parti
la raggiuni e io lu tortu
e si ’nsistu ammisca ’i carti
’nfin’a chi mi vidi mortu.
Si nta machina poi semu
io chi guidu e idda ’o latu
prim’ancora ca partemu
sugnu menzu cunzumatu.
No!!...sbagghiasti è chidda ’a strata
nun fari passari a chiddu
gira ’i cca...fai ’na sunata
sata ’n seggia com’ariddu.
Havi ’na gran facci tosta
penza cosi e nun li dici
e pritenni la risposta
m’at’a cridiri un’haiu paci.
Ma cu tutt’i so’ difetti
mi la tegnu stritta e cara
ca cu chiddu chi si senti
c’è di peggiu nta quarara.
Pi daccordu sempri jiri
lu sigretu ’u sannu tutti
la mugghieri ’un cuntrariari
mancia vivi e ti nni futti.
Copyright ©2005 Vincenzo Aiello Tutti i diritti riservati.