L’urtimu cipressu

L'urtimu cipressu

L’urtimu cipressu

Mureru tutti ’i to’ cumpagni ’i viaggiu

e ti lassaru cca menzu cunsuntu

nta stu Viali d’’i Cipressi ’i l’Aspra.

Comu surdatu firutu

di ’na verra fatta ’i bummi di cimentu

ti viu affucatu ’ntra vrazza ’i balatuna

e sentu ’u to’ çiatùni mentri assacchi.

’A stissa petra

ca dava a stu paisi lu splinnuri

ora ti strinci ‘i cannarozza

com’un tradituri.

Puru l’urtimi  troffi virdi

’n pinnuliàti a li to’ vrazza

su’ assicutàti d’’u malisiccu

e ’a to’ carni camuluta d’’u tempu

chianci ruppa di vecchi ricordi.

E ti taliavanu mmiriusi li passanti

ora ’nveci c’è sulu cu aspetta

ca li furturati t’abbattinu

pi fari ’i tia lignami ’i furnacella

e c’’a to’ ramagghia camiari furna

dunni cociri pani d’’u çiavuru anticu.

Cchiù ncapu a tripiceddu

vardiani d’’a villa Santu Siroru

chi fu di lu Marchisi e ’a so signura

dui arvulazza di nautra razza

ti talianu siddiati

aspittànnu lu tempu chi passa.

Forsi nta ri vuatri vi parrati

e vi cuntati passati

di quannu eravu picciotti.

Ora ’nveci

comu ’i vecchi piscatura d’’u scaru

vi stati dda ….assulicchiarivi

mentri jucati a li carti

d’’i l’urtimi raggi ’i suli

aspittannu chi la sira arriva

e astuta ’u jornu.

Vincenzo Aiello

Bagheria, 4 settembre 2010

Nessun commento ancora

Lascia una risposta

L'indirizzo email non verrà pubblicato. I campi obbligatori sono contrassegnati *