Lu travagghiu

4 R

Lu travagghiu

 

Cu è ca un l’avi sempri ’u cerca

cu l’attrova è furtunatu

e com’un farfanti ’nsisti

ca nun fu raccumannatu.

 

Cu ci l’avi ’un si n’adduna

d’’a furtuna chi pussedi

spissu joca cu lu focu

dannusi la zappa ’e pedi.

 

C’è cu avi chiddu fissu

e chi abbùlla ’u cartillinu

d’’u cullega so cchiu amicu

sia la sira ca ’u matinu.

 

Poi s’’u mpìu un beddu jornu

tuttu ’nsemmula trabballa

cu la cassa ’ntigrazioni

si ’ncatinanu nna sbarra.

 

C’è cu l’avi e sputrunìa

comu fussi supra ’a vara

cu è pigghiatu ’i lagnusia

e vidennulu cci spara.

 

Lu diavulu ’u ’nvintàu

ci cadissinu li manu

però l’omu senza d’iddu

’un’è porcu e ne cristianu.

 

Vincenzo Aiello

Bagheria, 12 maggio 2010

Nessun commento ancora

Lascia una risposta

L'indirizzo email non verrà pubblicato. I campi obbligatori sono contrassegnati *