Lu smartfon
Chi semu arridduciuti sapuriti
tutti c’’u jiriteddu scinni e acchiana
ognunu p’’u so cuntu e un ni ‘ntiressa
s’’a vita chi trascurri è persa e vana.
Si semu supra ’u tram o puru ’n trenu
la prima cosa ’i fari è lu pigghiari
sta camurrìa ca addivintò ’na droga
e nta Vazzapp e Fesbuc missaggiari.
Si prima si faceva ’na prijera
prima di cuminciari a manciari
ora si fa inveci lu ritrattu
o piattu, e forsi poi po accuminciari.
Tra n’agghiuttuta e l’avutra però
pi fari mmìria a amici e parintatu
mittemu lu manciari mpiattatu
nton bellu post ’i Fesbuc pubblicatu.
L’amici ca lu vidinu all’istanti
s’allestinu a taliari e cummintari
ma nsutta nsutta pensanu nta d’iddi
“ma chistu unn’havi avutri chiffari?!”
Li picciutteddi poi sunnu mpazzuti
tuttu lu tempu selfi e missaggiari
ca quannu ’i vidi scriviri a mitragghia
nta dda tastera senza taliari…
Ormai hannu li jirita nzignati
chi volanu nte tasti com’u ventu
missaggi chi faccini e li ritratta
nto n’ura ti nni mannanu triccentu!
La sira la mugghieri nno divanu
e lu maritu misu all’autra punta
chi parranu mannannusi missaggi
io pensu, chista è strata ca nun spunta!!
Nni collegamu a internet e jucamu
Tuttu lu tempu stamu a murritiari
scurdannuni la cosa cchiu mpurtanti
ca stu strummentu, è pi telefunari!!
Vincenzo Aiello
Bagheria, novembre 2017