Lu pettirrussu

Un’acidduzzu tantu sapuritu

mi veni a truvari ogni matina

di russu avi lu pettu culuritu

e d’’i pàmpini suca l’acquazzina.

Quannu lu viu spuntari ’u cori sciala

e si mi vidi fa finta di nenti

spinziratizza iddu m’arriala

vidennulu satari allegramenti.

Dintra lu jaddinaru poi furrìa

e tastunìa pizzudda ’i furmintuni

siddu s’affuca l’acqua pizzulìa

e non disdegna c’occhi piddizzuni.

’I jaddini pensanu; “ma chi camurrìa!

quann’è ca si nni vani stu scruccuni?

cca mancia cu fa l’ova, pussa via!

s’un ti nni va, scippasti pizzuluni!!”

Allura, si nni nesci scunzulatu

e satariannu veni o latu a mia

si fa na cantatedda a tuttu çiatu

e si nni va vulannu, a la campìa.

Vincenzo Aiello

Bagheria, 21 marzo 2017