Lu patruni onniputenti di lu celu

lupatrunirilucielu

Lu patruni onniputenti di lu celu

Lu suli

ca dda matina addumò lu celu

pi nuddu mutivu vosi la cumpagnia di li negghi.

Ci lu dissi chiaru e tunnu.

Sta jurnata nun v’aviti a fari a vidiri di li me occhi

pirchì haiu un travagghiu ‘mpurtanti a fari.

Cu lu me çiatu

vogghiu quadiàri tutti li cosi ca sunnu ddassutta.

Vogghiu ‘nciammari çiuri, mari, arvuli, armali

e squagghiari lu ghiacciu

ca c’è dintra li cori di l’omini tinti

chiddi ca s’arruspigghianu cu lu pinzeru

d’ammazzari Abeli.

Vogghiu parraricci nta l’aricchi

pi pirsuadilli a vurricari sutta la rina cchiu funnuta

fucili e bummi.

E faricci capiri ca nun è na striscia di terra

la cosa cchiu ‘mpurtanti di sta vita

Ma è l’amuri, chi sarva la vita

pi poi scialari

cca ncapu cu nuatri

vicinu a lu patruni onniputenti di lu celu.

 Vincenzo Aiello

 Bagheria,12 luglio 2006

Nessun commento ancora

Lascia una risposta

L'indirizzo email non verrà pubblicato. I campi obbligatori sono contrassegnati *