L’occhi di me matri

occhi

L’occhi di me matri

Quannu l’occhi di me matri

brillavano comu ’n mari a lu tramuntu

’a so vucca annacava canzuni spinzirati

p’’i so figghi … p’’u so amuri…

E cincu voti ’a mammàna nta so casa.

E cincu voti vuçi ’i duluri e cuntintizza.

E cincu voti pannizzi stisi o suli.

E cincu voti culostra d’’i so minni p’’u nutricu.

’Na vita di strittizzi ma cuntenti

li jorna çiancu a çiancu a lu so omu.

Cu la so manu ’i mastra custurera

cu quattru pezzi ’i robba ’miricana

puntiava pi nuatri nicareddi

cammìsi…gonnellini… cravatteddi

pi fàrinni jiri sempri assistimati.

’A lana travagghiata cu li busi

nta li so manu d’oru addivintava

quasetti pi la notti o ’na sciallina

birritti pi la nivi c’’u giummiddu

e manticeddi di tanti culura

ca ’i notti m’arricriavanu ’i qualura.

Li  vitti astutari ddu jornu

l’occhi di me matri

lu jornu ca me patri un ci fu cchiù

e puru s’’a so vucca

di jornu scaccaniava

passava tutti ’i notti

assammarari ’u cuscinu di lacrimi.

Mi lu cunfirò mentri si nni java

cu l’occhi ca cci brillavano nautra vota

cuntenta di jiri ’ncontru a lu so amuri

ca l’aspittava a çiancu d’’u Signuri.

Vincenzo Aiello

Bagheria,  1 dicembre 2010

Nessun commento ancora

Lascia una risposta

L'indirizzo email non verrà pubblicato. I campi obbligatori sono contrassegnati *