Li vecchi d’’a Baharia

vecchi siciliani

Li vecchi d’’a Baharia

S’arridduceru picca

li vecchi ca si juncinu a la chiazza

e si cuntanu nte jirita

chiddi ca hannu la storia stampata nta facci.

Nni viu unu chi havi ’a frunti comu na carta ’i musica

e mi sfirnicìu a leggiri zoccu havi scrittu nni dda ’mpigna.

Mi pari di leggiri ca era un campagnolu

chi zappava la so terra

pi nutricari lu fruttu d’oru

unu ’i chiddi ca jiccannu sudura di zappuni

arriniscìu a dari dignità e na casa a la so famigghia.

E zappava…e abbivirava…e a tempu di ricota

si faceva rumpiri la carina d’’i cartidduna

e c’’u strascinu chinu di casciuna

e ’u çiavuru d’’u cavaddu nte naschi

purtava la robba nova a lu majasenu.

E chiddu…mi pari di leggiri ca era n’arrimunnaturi

ca comu un diritturi d’orchestra

tineva ’n manu forbicia e sirraculu

e struncava cu mastrìa li rama cchiu lagnusi.

Mi pari di leggiri ora nta frunti ’i navutru

ca era un majasinaru chi spiricuddava, calibbrava

e ammugghiava ’i limiuna nta carta palina disignata

mpustannuli a facci vista nte casciuna p’’a spidizioni.

Leggiu inveci ntall’autru

ca comu me patri travagghiava a la Carovana *

a jinchiri vacuna d’’i treni

ca ogni sira partevanu chini di limiuna

p’’u cuntinenti italianu e l’esteru.

Ora ca supranìa lu malisiccu

nta li jardini menzi sdisulati

e l’urtimi vecchi chi ficinu la storia

di la granni Baharia vannu murennu

di bonu cca n’arresta picca e nenti.

Quasi quasi puru li Pupi di Palaunìa

si putissinu scinniri

di supra ’i pipituna unni su’ appujati

si facissinu la truscia

pi scappari luntanu di stu paisi

addivintatu stràniu.

Vincenzo Aiello

Bagheria, 7 marzo 2014

 

* Carovana – cooperativa di braccianti che svolgevano il lavoro di caricamento dei limoni sui vagoni ferroviari.

Nessun commento ancora

Lascia una risposta

L'indirizzo email non verrà pubblicato. I campi obbligatori sono contrassegnati *