La sìmina e la ricòta

lasiminaelaricota

La sìmina e la ricòta

E tiru ’a summa di sti cinquant’anni

di tuttu ’u siminatu e la ricòta

jorna campati e jorna strascinati

cu la spiranza ch’a vintura vota.

Travagghiu n’haiu ammuttatu ’i nicu e nicu

e ’n quantitati nni canciai misteri

di chiddu ’i San Giuseppi ch’è ’u cchiù anticu

anfin’à chiddu di lu ferruvieri.

Nta la me vita appi la vintura

di nasciri ’i famigghia assistimata

ca puru senza tanti cugnintùra

di lu rispettu ’i tutti è cummigghiata.

Ma la cchiù granni di vintura ch’appi

fu chidda ’i capitari ’na picciotta

ca li megghiu virtù li teni a rappi

e un’euru lu fa deci nta na botta.

Tri çiuri idda mi detti tri tisori

tri masculi ca sunnu ’i gran valuri

ognunu d’iddi cu pregi e difetti

ma ’i ’ducazioni sunnu vinnitùri.

Corpa di mari la nostra varcuzza

nna vistu e supiratu nichi e grossi

ma cu l’ajutu di lu Signuruzzu

hamu saputu nesciri d’’i fossi.

E propriu a Iddu ora ci addumannu

n’anticchia di saluti e poi d’abbentu

ca pi campari ancora c’occhi annu

mi servinu puru ca un toccu ’i centu.

Amici, fidi, lu rispettu e ’amuri

chisti sunnu pi l’omu ca ’i simina

li megghiu frutti e li cchiù beddi çiuri

e ju li cogghiu e çiauru ogni matina.

Chista è la summa d’’i me cinquant’anni

di zoccu siminavu e la ricòta

di çiauru n’haiu lassatu a tutti ’i banni

e mi nni futtu s’’a vintura ’un vota.

Nessun commento ancora

Lascia una risposta

L'indirizzo email non verrà pubblicato. I campi obbligatori sono contrassegnati *