La festa di li morti
Pi jiri sempri appressu a chistu e a chiddu
stamu pirdennu ’i beddi tradizioni
lassati di li nostri nanni beddi
chi l’addivaru cu tant’affizioni.
D’’i tempi ca jo era carmuceddu
s’affaccianu affruntusi li rigordi
di quannu s’aspittava ca agghiurnava
a’ fini d’’a nuttata di li morti.
Appena arruspigghiatu jo circava
cusiritusu unn’era ammucciatu
lu scatulu d’’i scarpi ch’i riàla
ca ’i murticeddi avianu purtatu.
Lu cuntinutu era sempri chiddu
’na machinicchia a corda o ’na pistola
’na pupa ’i zuccaru e ’na pasta ’i meli
ma si cci penzu ancora ’u cori vola.
E ora pi cupiari ’i miricani
n’arridducemu a fari di sta festa
’na buffuniata di vampiri e streghi
e picciuttedi ch’i cucuzzi ’n testa.
Vincenzo Aiello
Bagheria, 30 ottobre 2012
Bellissima poesia mi riporta indietro di tanti anni