Foddi ’i tia

foddiitia

Foddi ’i tia

Certi mumenti un foddi io mi sentu

senza risettu mi giru e mi firrìu

circannu c’occhi cosa ca nun trovu

però zocch’è ’un lu sacciu mancu io.

Su tutti firnicìi ca io un’avìa

prima ’i ’ncuntrari a tia amanti mia

cu ’na man’ à mascidda io campava*

inveci ora haiu sempri ’a testa a tia.

Quannu ’na strània tu eri pi mia…nun vidìa

ma di essiri orvu nun sapìa

ntisa di l’aricchi un’avìa

e ’u fattu ca era surdu scanuscìa.

Inveci ora talìu nu gabbianu

e già cu iddu volu

vìu un tramuntu ’i suli

e a lampu miu lu fazzu.

Ora havi un pezzu, e già ci fici ’u caddu

ma a prima mi sinteva ’anticchia pazzu.

Nno spissuliddu tu la notti vigghi

pi lu disìu addumatu chi hai ntò cori

mi veni araçiu ’o latu e m’arruspìgghi

çiatànnu dintra ’i mia duci palori.

Si c’è ’n’anticchia ’i largu nna me menti

è na gnunidda risirvata a tia

ti pigghiu e ti ci appoju ducimenti

e ntà l’aricchi tu parri cu mia.

Tortu nun n’appi propriu me mugghieri

ddu jornu ca mi dissi “Vicinzìnu!

Ti viu pigghiatu troppu d’’i pinzeri

di quannu teni ’n manu lu pinninu”.

Ma chi ci pozzu fari siddu tuni

di mia facisti un’omu sugnaturi

’i tantu ’n tantu tu mi du ’n vasuni

e arreri cuminciamu a fari ’amuri.

Quannu ti sentu ’u cori scaccanìa

puisia… m’arridducivu foddi ’i tia.

Nessun commento ancora

Lascia una risposta

L'indirizzo email non verrà pubblicato. I campi obbligatori sono contrassegnati *