Fimmina
Chi fussimu nuatri senza d’idda?
pruvulazzu, nte manu d’’u ventu.
Stiddi astutati chi girassinu senza meta.
Occhi asciutti ca ‘un putissinu chianciri.
Palummi cu l’ali struppiati
senza un celu dunni vulari.
Chistu fussimu senza ’a fimmina!
Primu nutrimentu e funti di mizzigghi
e capricchi dunni addattari
spiranzi di vita.
Dda vita ca sulu idda po dunari
ammucciannu duluri
darreri a veli di surrisi
cu l’occhi sempri chini
taliannu ddu nutricu.
Lu stissu nutricu
ca ora fattu omu
la talia cu disprezzu
e la teni suttamisa a lu so vuliri.
Ma ora basta !!
Nun mi lu diri cchiu
ca sti bulli nivuri nta peddi
ti li facisti cadennu d’’a scala.
Nun mi lu diri cchiu
ca ddu mussu vunciu
ti lu facisti sbattennu nta la porta.
Pigghia curaggiu fimmina
na vota pi sempri
ripigghiati la to vita
senza cchiu campari
c’’u scantu dintra l’occhi.
Grapili sti occhi, e cummatti.
Tu po vinciri
anzi nni sugnu sicuru.
Picchì tu si forti fimmina
picchì tu si Fimmina
e nuddu omu
ca accussì si po chiamari
s’ava mai pirmettiri
di Tia malitrattari!
Vincenzo Aiello
Bagheria, dicembre 2017