Fijuri stinciùti

Fijuri stinciuti

Fijuri stinciùti

Di supra ‘na balata

alluçiata d’un suli giarnu

comu facci di mortu nto tabbutu

assummanu ricordi

spirtusati d’’a camula d’’u tempu.

E la menti arranca

pi fàrinni filara di vigna ritta

stinnicchiata nna fàuçi

suliscenti d’un munti.

Ncucciati a li sarmenti

pinnulianu ‘rappi mpassuluti

di fijuri stinciùti

comu …

çiatu nto vitru mentri chiovi

ca cchiu li spremu

sutta la màcina d’’a menti

e cchiu picca sucu m’arrialanu

ca mancu m’abbasta

pi livarimi la cchiu tinta arsura

chi haiu ’nto cori.

Vincenzo Aiello

Bagheria, 25 novembre 2009

Nessun commento ancora

Lascia una risposta

L'indirizzo email non verrà pubblicato. I campi obbligatori sono contrassegnati *