Figghiu miu

Figghiu miu

(a mio figlio Salvatore)

Di ’na ’ngagghidda ’i scaletta d’’a finestra

si vidi appujatu supra un ped’alivi

un pezzu ’i celu di la terra nostra

chinu d’un suli chi squagghiò la nivi.

Io ’u vulissi arritagghiari e mannallu a tia

’accussì quannu senti friddu a stu Birlinu

ti lu metti ò latu ca iddu ti quadìa

e a nuatri e a Baharia ti senti cchiù vicinu.

Cuntentu campa siddu ddocu a stari

e penza a custruiriti un futuru

nn’a vita ’i sacrifici s’hann’a fari

t’’u dici unu ca nni fici puru.

Fatti li cunticedda ’a tò sacchetta

e siddu vidi ca ’un ti torna ’u cuntu

c’è sempri ccà qualcunu ca t’aspetta

un ci pinzari e un ti pigghiari scantu.

Ora ti dugnu un vasuni granni

spirannu ca cuntentu pò ti viu

spennili boni sti tò Vintun’anni

auguri p’’a tò vita “Figghiu Miu”.