- L'Uomo - Il Poeta - Riconoscimenti - Bagheria - Contatto - Home -
- Opere Siciliane - Opere Italiane - Traduzioni in lingua Italiana - Cunti - Concorsi - Blog -
Figghi d’’a stissa matri Baharia
(a Peppuccio Tornatore)
Nun semu amici e mancu canuscenti
eppuru com’un frati io ti sentu.
Facisti bonu tannu a jiritìnni
’nzistùsu... assicutànnu lu to sonnu.
’A vita ti premiàu... niscisti fora
la to bravura ora è canusciuta
di li cchiu granni critici d’’u munnu
ch’ammuntuàru la to “Scanusciuta”.
Tu nni purtasti avutu cu tia
vulari nni facisti supra ’i negghi
ca nfrùscanu lu celu ’i Baharia
e chiovinu acqua trubbula di mbrogghi.
Che bellu quannu ’i giurnàla
ammuntùanu ’a Baharia
ricurdannu un pitturi p’’a so” Vucciria”
o un pueta p’’a so “Parru cu tia”
un fotografu p’’a so “Chiddi d’’a Baharia”
o di ’na pillicula girata propria ’i Tia
...e no sempri p’’a stissa camurrìa.
’U sacciu ca ’a to testa è sempri ccani
puru siddu ’i to peri su’ luntani
ma è vizziu di nuatri siciliani
d’addisiàri sempri ’u nostru pani.
Ciaràri un çiuri ’i zagara ’i lumiuni.
Assittàriti nta ’na seggia ’mpagghiata.
Munnàri un bastarduni scippatu d’’a rama
e manciaritìllu a strica-sali.
Ciarari un pugnu d’àlica d’’u mari ’i l’Aspra.
Tastari un pizzuddu ’i sfinciuni
nne jucati ’i natali.
Tutti ’i voti ca ti manca una di sti cosi
puru siddu ’a to manu
un’ha mai strinciùtu ’a mia
Peppucciu semu frati... sent’à mia
figghi d’’a stissa matri Baharia.
Copyright ©2005 Vincenzo Aiello Tutti i diritti riservati.