Federicu
(a mio figlio Federico nel giorno del suo 18° compleanno)
Nascisti nicu comu un cunigghieddu
ma li biddizzi to’ già li ‘mustravi
capiddi di carvuni e occhiu beddu
com’un ritrattu tu m’assimigghiavi.
Mairu siccu nta pàmpina criscivi
ca nni passammu jorna di pinzeri
quant’acidduzzu…. picca tu manciavi
e ‘nfin’a du’ anni menzu mutu eri.
Ma doppu tanti stenti po’ spicasti
cchiu longu ‘i mia ora ti facisti
comu ‘nu tàvaru ora addivintasti
e a tipu canna ‘i stenniri allungasti.
Ti piaci fari ‘u jocu-fucuraru
di nicu e nicu hai sta passioni
e puru fari lu tammurinaru
ma pigghi sbagghi s’hai sti ‘ntinzioni.
Sti cosi falli puru…. ma pi svagu
nne jorna ca lu tempu t’accunsenti
d’ora ‘n avanti ‘a vita un’è cchiu un jocu
tasta ogni cosa e nun lassari nenti.
Ci dici sempri si a ccu cerca aiutu
di tutti li picciotti un ver’amicu
un’umiceddu veru assistimatu
e bravu!!…stu me figghiu Federicu.
Vincenzo Aiello
Bagheria, 15 maggio 2009