E musica si fa
Picchì m’avia abbannunatu Musa mia?
Arrassu ’i tia
li me’ occhi s’avianu siccatu
e cchiu luntanu ’i docu nun vidia.
L’aricchi mei eranu attuppati
e n’un sintìa mancu di vicinu.
Ora ca arreri haiu a tia o latu
puru cu l’occhi a pampinedda
vidu chiossà di l’aipa
chi vola leggiu ’n celu
e ’i dda ncapu vidi
tutti li pisci ca sunnu dintra ’u mari.
E ascutu arreri
tuttu chiddu ca lu silenziu
mi çiata nni l’aricchi.
E musica si fa
lu cadiri
d’’i primi sbrizzi di sittemmiri
supra li pampini d’’i sarmenti.
E rusignolu mi sentu
chi canta appujato nt’a rama ‘i nespulu
mentri la puisia chi cadi d’’u çelu
m’arrifrisca li pinni.
Vincenzo Aiello
Bagheria, 15 aprile 2013