Diciott’anni
(A mio figlio Fabio)
E pari ca fu ajeri ca nascisti
dui chila e setticentu di biddizzi
c’’a to vinuta ’o munnu nni facisti
jinchiri l’occhi e ’u cori ’i cuntintizzi.
Quannu ammuttava lu to passigginu
la genti alluciàta si firmava
pi dari ’na taliata ’o Principinu
ca ’n menzu ’i linzuledda sunnacchiàva.
Criscisti ora e ti facisti granni
ca mancu m’addunavu ca passàru
nta nu fallanti sti to diciott’anni
nto mentri ’i pila janchi mi spuntaru.
Ora ca maggiurenni addivintasti
un ti muntari a testa figghiu beddu
patruni d’’a to vita ti facisti.
Jisa la cricchia addritta com’un gaddu
li anni to cchiù duci sunnu chisti
pisa ogni cosa cu lu ciriveddu.