Tra ’i righi d’’u quadernu d’’a me vita
haiu scrivutu cu nchiostru di sudura
e sangu chi scinni
d’’i chiaj d’’a me suffirenza.
Palori ca si legginu cu l’occhi di lu cori.
Cori siddiatu
pi chiddu ca un’arriniscivu a fari.
Cori cuntentu
p’’i çiuri chi sappi cultivari.
Nt’on jardinu chi talìa Roccabusambra
misi chiantìmi
e arvuli
e simenza
chi dettiru duci frutti
chi ncilippàru lu me campari.
Ogni sira
sutta di la chiarìa d’’a me luna
cantanu li giuràni
chi sguazzanu dintra nu zàccanu
ammucciatu darreri lu cannitu d’’i me jorna.
Vincenzo Aiello
Bagheria Dicembre 2018