Cuteddi puntùti

cuteddipuntuti

Cuteddi puntùti

 

Mi spuntò davanti l’occhi comu ’na filùca.

Truncu senza ’ràrichi supra dda seggia

ammugghiava rutàti di marciaperi.

Chi piatà chi mi fici.

Iddu….picciottu

chi ancora s’avissi arrusicàri ’u munnu a muzzicuna

assittatu pi sempri supra ddu trìspitu.

 

Eppuru ’i so occhi un’eranu siddiati.

Supra na panza vuncia di nguttùmu

’a so vucca ridìa.

’U giurnalàru ca comu ogni matina ’u vitti ncugnari

ci allungò ’u giurnali chinu d’’i soliti minchiati.

Iddu ci detti ’na taliata lesta d’abitudini

poi c’un sàutu s’’u fici spirìri sutt’ò culu.

 

’I cristiàni chi passavanu

ci tiravanu ’i ncoddu taliati ’i cumpassioni.

Pi iddu eranu cuteddi puntùti

ca ci azziccàvanu ritti ritti

nna d’anticchia ’i curaggiu

ca iddu circava di mantinìri vivu

p’un’affunnari nno scunfortu.

A la ’ntrasatta ’i dintra ’u giubbottu

chiddu chi a prim’acchittu

m’avìa parsu panza …si muvìa.

 

D’un parmu di cirnera aperta

spuntàru tisi un paru d’aricchi

ca s’annacàvanu supra dui cocci d’alivi niuri

e un nasiddu culuri rapparìnu.

 

’U canuzzu ci facìa cumpagnìa

tutti li voti ca la gnuranza ’i l’omu

lu facìa sentiri sulu.

 

Si svampò tri sicaretti un’appressu all’autra

allisciànnu dda tistuzza c’’u pinzeru luntanu

c’’u sapi dunni.

 

Sutta lu celu d’’a so svintura

iddu chiantàtu pi sempri dda

havi l’occhi chi scaccanìanu

e io riccu a ’massa ad’iddu

mi ritrovu mìnnicu

e ’o spissu chianciu

’i rintra e rintra

senza sapiri ’u picchì.

Nessun commento ancora

Lascia una risposta

L'indirizzo email non verrà pubblicato. I campi obbligatori sono contrassegnati *