Corso Butera 333

corso butera 333

Corso Butera 333

Passaru ormai ott’anni e mi ritorna

nta menti doppu la so juta ’n celu

me matri bonarmuzza e la so casa

e sentu ca nto cori scinni un velu.

Ddu niru ’unni criscìu la me famigghia

fu pi nuatri naca di l’amuri

ma doppu ca si nni iu puru me matri

addivintò jardinu senza un ciuri.

’Na dicisioni …vinniri o affittari

e vinnita ci fù cu pena ’i cori

però a stu puntu c’era ’i sbarazzari

dda casa china di tanti tisori.

Quanti ritratta di jorna filici

di nuatri picciriddi o granniceddi

me patri di me matri ’namuratu

si cci liggeva sutta ’i mustazzeddi.

Pi li me soru dui machini ’i cusiri

linzola piatta tazzi e mappini

pi nuatri frati machina ’i lavari

un friggider, seggi e cuttunini.

Nto menzu ’i tanti strùcchiuli e ricordi

a mia attuccò nu vecchiu vaciledddu

cu dintra petra ’i lumi, stagghiasangu

punseddu, lu sapuni e un zappuneddu.

Stu jornu mi passàru pi li manu

e ntisi un truppicuni dintra ’u pettu

faceva ancora çiavuru ’i me patri

“Papà, venimi ’n sonnu … io t’aspettu!!”

Vincenzo Aiello

 

 

Bagheria, 16 novembre 2015

Nessun commento ancora

Lascia una risposta

L'indirizzo email non verrà pubblicato. I campi obbligatori sono contrassegnati *