Comu dui ziti

penna e foglio

Comu dui ziti

La penna e ’u fogghiu jancu

su’ comu dui picciutteddi ziti

l’unu avi bisognu di l’avutra

e si cercanu notti e jornu.

Quannu la penna

accumincia a sciddicari

supr’a peddi sciacquata d’’u fogghiu

iddu s’attigghia.

Nun capisci cchiu nenti

e si lassa allisciari

comu fa nu ’namuratu.

Ci sunnu però jorna

ca comu la penna si ncugna a lu fogghiu

lu ’nchiostru ’un ni voli sentiri çiavuru

e comu dui ziti sciarriati

si votanu  li spaddi

e nuddu e nenti cci pò.

Passa tempu…un si sapi quantu

e si cercanu navutra vota.

E’ troppu forti lu beni chi si vonnu

e allura…

comu si mai nenti

avissi succidutu nta r’iddi

accumincianu a darisi vasuna

e fannu l’amuri.

E quannu surisfatti

l’unu di l’avutra si sazia

si talianu nta l’occchi

e comu pi magia

nascìu ’na nova puisia.

Vincenzo Aiello

 

Nessun commento ancora

Lascia una risposta

L'indirizzo email non verrà pubblicato. I campi obbligatori sono contrassegnati *