Ciauri d’antichi cufuneddi

stanotti trucculianu lu sonnu.

Ricordi mmaciuluti

d’’u troppu tempu passatu

chi pittimusi sbattulianu ntra d’iddi.

E la notti si fa lustra

tra jochi

di picciriddi nne vaneddi

e nanni

assittati attagghiu a li ntrati

a fari busi

e chiacchiari cu vucchi sgangulati

e prijeri

chi sgranavanu coccia di vecchi rusari.

Quannu poi scurava

tutti rintra.

Armali e cristiani

manciavamu zoccu n’attuccava

e tra un cuntu

na carizza

e nu sbaragghiu

ognunu a lu so giuccu si nni java.

Picca li picciuli e li cummirità

ma senziu di famigghia, nquantità!

Vincenzo Aiello

Bagheria, novembre 2017