Cappeddu di Napuliuni
(a Capo zafferano)
O tu, cappeddu di Napuliuni
chiamatu accussì d’’i genti antichi
la to biddizza un havi avutri pari
e cu lu pizzu ô celu tu ti strichi.
Attagghiu a tia mi sentu comu fussi
tuttùnu cu lu murmurìu d’’i scogghi
vasati notti e jornu di lu mari
e ’i çiavuri di chiàppara chi cogghi.
Lu faru com’un cori palpitanti
adduma e astuta sonni ’i piscaturi
ha fattu di ruffianu a tanti amanti
chi cumplici di tia fannu l’amuri.
L’aipa vola ’ncelu e va cantannu
’na musica chi ’ncanta e ammaarìa
la lapa ’i ciuri ’n ciuri va satannu
sucannu meli, e ’u cori si nni prìja.
Supra ’i to carni troffi di scupazzu
pali di ficudinnia e orchidei
pi nun parrari di lu zaffiranu
çiuri chi fa scialari l’occhi mei.
Lu suli ca si posa supra a tia
trova ristoru e paci, e s’arriposa
si scorda quasi quasi di cuddari
e daricci lu canciu a la so sposa.
La luna, poi la sira veni a tia
ti cunta zoccu fici nna jurnata
tu ti l’aggiucchi ’nvrazza comu figghia
e cu idda aspetti ’u suli, ’na nuttata.
Vincenzo Aiello
Bagheria; novembre 2018