Avìa occhi ca parràvanu cchiù assai di ’na vucca

aviaocchicaparravanu

Avìa occhi ca parràvanu cchiù assai di ’na vucca

(A mio padre)

 

Scriviri ’na puisia pi iddu

napocu di pueti l’hannu fattu.

Lu patri nun c’è cchiù

ti metti la pinna ’n manu

e scavannu nta li gnuni cchiù funnuti d’’a menti

cumincian’ assummari li megghiu rigordi.

 

Ma io vulìa tèniri pi mia lu rigordu

di quannu ddu jornu m’allisciò ’i capiddi.

 

Vulìa tèniri pi mia lu rigordu

di quannu mi purtò addiddì

nto siggiulinu d’’a so bricichetta.

 

Vulìa tèniri pi mia lu rigordu

di quannu m’acchianava ncavuseddu

p’’a festa ’i San Giuseppi.

 

Vulìa tèniri pi mia lu rigordu

di quannu mi purtò cu iddu

a carricari vacuna di limiuna

pi farimi capiri

ca era megghiu siddu io sturiàva

e ’i mpuddi nte manu

m’abbruçianu ora ca sugnu granni.

 

Vulìa tèniri pi mia lu rigordu

di quannu dda matina mi purtò a mari

e pi farimi preju

jucava ammoddu cu mia

com’un picciriddu.

 

Vulìa tèniri pi mia lu rigordu

di quannu pi natali

cu li vavareddi chianciulini liggeva a littra.

Vulìa tèniri pi mia lu rigordu

d’un patri ca chiacchiariava picca

ma avìa occhi ca parravanu cchiù assai di na vucca.

1 commento

  1. enza picone's Gravatar enza picone
    20 dicembre 2016    

    A ddi occhi.. Bastava na’ taliata….

Lascia una risposta

L'indirizzo email non verrà pubblicato. I campi obbligatori sono contrassegnati *