- L'Uomo  -  Il Poeta  -  Riconoscimenti  -  Bagheria  -  Contatto  -  Home  -

-  Opere Siciliane  -  Opere Italiane  -  Traduzioni in lingua Italiana   - Cunti - Concorsi - Blog -

 

Amuri di patri

 

’A vicchiaia ci arrappò ’a facci comu ’na cucuzza cintinàra.

Tortu comu ’na rama di limiùni torta

ogni matina prima ca lu suli adduma lu munnu

’un ci pari l’ura di satàri d’’u lettu.

Un crucchiulùni di pani, quattru alivi, lu bùmmulu, si nsacca ’a bunàca

zappùni ncucciàtu nta spadda e si metti ’n camìnu.

Càuru, friddu, acqua ’i çelu, nenti lu ferma.

Li pedi a strascinùni ma iddu havi a ghiri dda

a truvari li sò figghi di lignu.

Era ancora picciottu quannu li sò manu

ncarcàru ’a prima terra supra ddi ràrichi di chianticeddi piatusi.

E l’abbivirò cu stizzi di suduri.

Ci attuccò fari puru lu fumiràru

p’amuri di vidirli sprucchiàri firrigni.

E stava dda nta ddi notti di staçiuni

c’’a sula cumpagnìa d’’u zirrichìu d’’a cicala e lu cantu d’’a cucca

e c’’u sulu lustru d’’u mecciu d’un lampiùni

cafuddava corpa di zappuni grapennu e chiudennu conchi

pi dissitàri cu acqua frisca di cunnùttu

ddi arvulicchi ancora nutrìchi.

Crisceru e dèttinu li primi frutti d’oru.

Casciùna di robba nova e bastarduna

addivintaru beddi picciuluna

ca iddu araçiu araçiu accrucchiò

pi dari ’na casa a sò figghiu.

Sò figghiu... chiddu chi niscìu d’’i carni ’i sò mugghieri inveci

si nna sempri buzzaràtu d’’u jardinu.

Malacunnùtta ’nquantu mai

s’avissi mai binignatu ’na vota ’i dìricci

“Pà...vegnu cu tia a dàriti ’na manuzza d’ajutu!”

Sò figghiu...tantu disamuràtu versu ddi arvulicchi

ca ’un ci ficinu mai addisiàri un vistiteddu

ne un paru ’i pepè novi.

Sò figghiu... ca talìa ’u zappuni comu un nimìcu

e un capisci ca facennu ’accussì

chianta chiova nto cori d’’u patri.

Sò figghiu... ca appena iddu è cu ’n pedi nni la fossa

pi putìricci accattàri ’u tabbutu

è prontu a vìnniri dda terra

ca ’u fici crìsciri nte fasci d’oru.

E cu cardacìa

inveci d’allisciari masciddi

alliscia pàmpini vagnati d’’i so lacrimi

ch’arrestanu ancora virdi ’nfin’a quannu iddu

cci pò dari amuri di patri.

 

Indietro                

 Copyright ©2005 Vincenzo Aiello Tutti i diritti riservati.