A me Sicilia

amesicilia

’A me Sicilia

Di tia hannu scrittu tanti ca m’affruntu

comu siddu ’u cupiatu avissi a fari

ma c’è ’u me cori chi havi un beddu cuntu

e mi ’ncuraggia ’a manu a scritturari.

Jittàta fusti comu ’n cocciu ’i rrina

di li manu d’ un ventu sciluccusu

nto ’n mari ch’è ’u cchiù beddu d’’a cartina

ca di ’na banna è apertu e l’autru chiusu.

Di cucciteddu ’i rina tantu giarnu

cu aiutu di lu suli e d’’i surgivi

culuri tu pigghiasti un beddu jornu

di tò lumiuna aranci çiuri e alivi.

Ti senti ’u viddicheddu arrifriddatu

p’’a nivi ca dda ncapu sempri teni

ti lu quadìa ’a Natura c’’u so çiatu

comu na Matri ca ti voli beni.

Li megghiu artisti s’hannu ’namuratu

d’’i to tramunti e zagari çiarusi

d’’u jancu girsuminu ’mprufumatu

cassati e cannulicchi ddiliziusi.

’N curùnanu la luna ’a sira ’i stiddi

a tipu niputeddi attorn’a nanna

c’aricchi a lu pinneddu ognuna d’iddi

ascutanu li cunta chi ci manna.

E ascutanu la luna chi cci dici

chistu di cca è un pizzuddu ’i Paraddisu

ccàssutta lu Signuri si lu fici

pi quannu d’’i stanchizzi senti ’u pisu.

Penzu ca lu Signuri fu dicisu

a nun ci dari l’urtimu dittagghiu

’sinnò picchì chiamarlu Paraddisu

si ci mitteva puru lu travagghiu?

Nessun commento ancora

Lascia una risposta

L'indirizzo email non verrà pubblicato. I campi obbligatori sono contrassegnati *